Taytaykuna, mamaykuna llapantiykichikpas napaykusqapunim kankichik. Tupaq Amarupas, Mikaylapas runa simitapunim rimarqanku; ichaqa allin anti runahina kastilla simitapas mana yachachisqallam, uyarispallam rimayta atillarqankutaq; chayri, kay p'unchawkuna hatun kamachikuqkuna, kastilla mama simiyuq kaspa, ¿imaraykutaq qhichwa simitari manapuni rimayta atinkuchu? Icha, ¿pisi yuyayniyuqchu kankupas? ¿Ñutqhunkuchu huch'uypas? ¿Imaraykupunitaq paykunari qhichwa simitapas, huk runa simikunatapas manapuni rimayta atinkuchu? Yaqachus runa siminchikkunamantaqa p'inqakunkuman? ¿Machu Pikchunchikmantapas, mikhuyninchikkunamantapas, huk kawsayninchikkunamantapas, quri qullqi qhuyanchikkunamantari, ¿imaraykutaq mana p'inqakunkuchu? Qhichwa runapas, wak simi rimaq runakunapas qhawakuqllam, uyarikuqllam kayku, muchuytaqa allintam riqsiyku, tutatapas p'unchawman tukuchispam imatapas llamk'ayku; kutipakuytaqa yachaykutaqmi. Rimapayachkasqa mana uyarikuqkunataqa wanachiyta yachaykum; ichaqa ñawpaqta rimapayaykupuniraq. Manam ñuqaykuchu ñawsapas, ruqt'upas kayku; hukkunam, mistikunam mana uyarikuqqa kanku; mankapas t'impumuchkaspahina phuqchimunpuni ari. chayhinallataqmi sunquykupas, llamp'ulla kachkaspahina manchanatam phiñarikullantaq. Tupaq Amarup pachanpipas, kay p'unchawkunapas mana uyarikuq runapas, kamachikuqkunapas kanpunim; paqtataq tayta mamakuna, rimapayasqaqa uyarikuq kaychik, qhilli kawsaykunatapas rikuychik, ¡paqtataq! Qhipaman waqaypas, llakikuypas sasañam. Tupaq Amarupas, wak runakunapas rimapayakuqmi kayku, mana uyarisqaqa phiñarikuykumanmi; chaymantataq supayniykichikmanraq apachiykichikman; chay pachaqa rikukuq, qhawarikuq, uyarikuq kasunchik, amataq ari wallpahina wanq'uqa; icha, ¿qam manapunichus uyarikuq kawaq? Yapamantataq Tupaq Amaru rikch'arimunman.
Taytaykuna, mamaykuna llapantiykichikpas napaykusqapunim kankichik. Tupaq Amarupas, Mikaylapas runa simitapunim rimarqanku; ichaqa allin anti runahina kastilla simitapas mana yachachisqallam, uyarispallam rimayta atillarqankutaq; chayri, kay p'unchawkuna hatun kamachikuqkuna, kastilla mama simiyuq kaspa, ¿imaraykutaq qhichwa simitari manapuni rimayta atinkuchu? Icha, ¿pisi yuyayniyuqchu kankupas? ¿Ñutqhunkuchu huch'uypas? ¿Imaraykupunitaq paykunari qhichwa simitapas, huk runa simikunatapas manapuni rimayta atinkuchu? Yaqachus runa siminchikkunamantaqa p'inqakunkuman? ¿Machu Pikchunchikmantapas, mikhuyninchikkunamantapas, huk kawsayninchikkunamantapas, quri qullqi qhuyanchikkunamantari, ¿imaraykutaq mana p'inqakunkuchu?
Qhichwa runapas, wak simi rimaq runakunapas qhawakuqllam, uyarikuqllam kayku, muchuytaqa allintam riqsiyku, tutatapas p'unchawman tukuchispam imatapas llamk'ayku; kutipakuytaqa yachaykutaqmi. Rimapayachkasqa mana uyarikuqkunataqa wanachiyta yachaykum; ichaqa ñawpaqta rimapayaykupuniraq. Manam ñuqaykuchu ñawsapas, ruqt'upas kayku; hukkunam, mistikunam mana uyarikuqqa kanku; mankapas t'impumuchkaspahina phuqchimunpuni ari. chayhinallataqmi sunquykupas, llamp'ulla kachkaspahina manchanatam phiñarikullantaq.
Tupaq Amarup pachanpipas, kay p'unchawkunapas mana uyarikuq runapas, kamachikuqkunapas kanpunim; paqtataq tayta mamakuna, rimapayasqaqa uyarikuq kaychik, qhilli kawsaykunatapas rikuychik, ¡paqtataq! Qhipaman waqaypas, llakikuypas sasañam. Tupaq Amarupas, wak runakunapas rimapayakuqmi kayku, mana uyarisqaqa phiñarikuykumanmi; chaymantataq supayniykichikmanraq apachiykichikman; chay pachaqa rikukuq, qhawarikuq, uyarikuq kasunchik, amataq ari wallpahina wanq'uqa; icha, ¿qam manapunichus uyarikuq kawaq? Yapamantataq Tupaq Amaru rikch'arimunman.