Taytaykuna, mamaykuna llapanniykichiktapas napaykuykichikpunim ñawpaqtaqa, chaymantañataq chakra llamk'aq runakunata, uywa michiq runakunatapas ch'uqulluytapas ch'utikusparaqmi napaykamuykichik; qamkuna mana llamk'aptiykichikri, ¿imatataq mikhuykuman? Yaqapas qamkunalla makiyuqqa kawaqchik, hukkunaqa simillayuqmi kayku, wiksallayuqmi kayku; kallantaqmi hukkunapas, chaykunaqa tiyasqallankumanta, mana imatapas rurasqankumanta mikhuyllata yachanku. ¿Yaqachus ñuqapas chay ukhupi yupakuyman? Ichaqa ñuqaqa allpaypas manaña kaptinpas ima k'aprakunallapipas q'úmir yurachakunata mirachini; kaqtaq iskay kimsa quiwillatapas uywani; ¿qamkunari ch'uñullatapas tarpunkichikchu? Mana ¿riki? chayraykum chakra ruraqkunataqa anchatapuni yupaychakuni. Yachay wasikunapi wawakunamanpas chakra llamk'aytaqa yachachinanchikpunim, mana chayri, ¿imata mikhuspataq kawsanqaku? Icha, ¿leche Pura Vidatachu? rantisunchikpas kawsananchikpaq? Mikhunanchikqa kaypi nichkankuhina "Chakramanta mankaman" mana q'upakunatachu, mana hukkunap mana munasqantachu; mana laboratoriokunapi imamantaraq rurasqa q'upakunatachu. Chaykunata mikhuspari ari Almenara hospitalkunatapas sapa p'unchaw hunt'achkanchik; ñawpaqri, Inkakunap kawsaynin pachapiri ¿maypitaq Almenarakunapas karqan? Chakramanta mikhuspaqa manam unquykunatachu mikhunchik, chakramanta mikhuptinchikqa manam wiksasapachu kanchik, manam cancer unquypas, huk unquykunapas riqsikurqanchu, ¿kunanri? Hampi rantina wasikunalla, hampina wasikunalla kaypipas maypipas sapa p'unchaw aswan rikhurimuchkan. ¿Ima qullqiwantaq chaykunari rikhurimun? Chaykunaqa wakcha runap qullqinwan ari, hampi qhatuna wasikunapipas, ¿yachanchikchu, rikunchikchu? ¡Imataraq qhatullawanchiktaq! Llapan chay rimasqayraykum, mikhunanchikqa chakramanta hamuq ch'uya mikhuykunata, mana unquyniyuq mikhuykunata, mana rurasqa mikhuykunatachu. Chayraykum chakra ruraq runataqa yupaychakunanchikpunim. Ñuqamantaqa paykunallam llamk'aqqa kanku, hukkunataq mikhuqlla kanchik, ¿riki? Kayqa manam ñuqap yuyayniyllachu, tayta Juan Velasco Alvaradom chay yuyaykunawan hamurqan; chay Velascoqa allin yuuyayniyuqmi karqan, manam kunanhina suwakunachu. ¡Kawsachun chakra llamk'aq runa! ¡Kawsachun Juan Velasco Alvarado! ¡Kawsachun qhichwa siminchik!
Taytaykuna, mamaykuna
Taytaykuna, mamaykuna llapanniykichiktapas napaykuykichikpunim ñawpaqtaqa, chaymantañataq chakra llamk'aq runakunata, uywa michiq runakunatapas ch'uqulluytapas ch'utikusparaqmi napaykamuykichik; qamkuna mana llamk'aptiykichikri, ¿imatataq mikhuykuman? Yaqapas qamkunalla makiyuqqa kawaqchik, hukkunaqa simillayuqmi kayku, wiksallayuqmi kayku; kallantaqmi hukkunapas, chaykunaqa tiyasqallankumanta, mana imatapas rurasqankumanta mikhuyllata yachanku. ¿Yaqachus ñuqapas chay ukhupi yupakuyman? Ichaqa ñuqaqa allpaypas manaña kaptinpas ima k'aprakunallapipas q'úmir yurachakunata mirachini; kaqtaq iskay kimsa quiwillatapas uywani; ¿qamkunari ch'uñullatapas tarpunkichikchu? Mana ¿riki? chayraykum chakra ruraqkunataqa anchatapuni yupaychakuni. Yachay wasikunapi wawakunamanpas chakra llamk'aytaqa yachachinanchikpunim, mana chayri, ¿imata mikhuspataq kawsanqaku? Icha, ¿leche Pura Vidatachu? rantisunchikpas kawsananchikpaq? Mikhunanchikqa kaypi nichkankuhina "Chakramanta mankaman" mana q'upakunatachu, mana hukkunap mana munasqantachu; mana laboratoriokunapi imamantaraq rurasqa q'upakunatachu. Chaykunata mikhuspari ari Almenara hospitalkunatapas sapa p'unchaw hunt'achkanchik; ñawpaqri, Inkakunap kawsaynin pachapiri ¿maypitaq Almenarakunapas karqan? Chakramanta mikhuspaqa manam unquykunatachu mikhunchik, chakramanta mikhuptinchikqa manam wiksasapachu kanchik, manam cancer unquypas, huk unquykunapas riqsikurqanchu, ¿kunanri? Hampi rantina wasikunalla, hampina wasikunalla kaypipas maypipas sapa p'unchaw aswan rikhurimuchkan. ¿Ima qullqiwantaq chaykunari rikhurimun? Chaykunaqa wakcha runap qullqinwan ari, hampi qhatuna wasikunapipas, ¿yachanchikchu, rikunchikchu? ¡Imataraq qhatullawanchiktaq! Llapan chay rimasqayraykum, mikhunanchikqa chakramanta hamuq ch'uya mikhuykunata, mana unquyniyuq mikhuykunata, mana rurasqa mikhuykunatachu. Chayraykum chakra ruraq runataqa yupaychakunanchikpunim. Ñuqamantaqa paykunallam llamk'aqqa kanku, hukkunataq mikhuqlla kanchik, ¿riki? Kayqa manam ñuqap yuyayniyllachu, tayta Juan Velasco Alvaradom chay yuyaykunawan hamurqan; chay Velascoqa allin yuuyayniyuqmi karqan, manam kunanhina suwakunachu. ¡Kawsachun chakra llamk'aq runa! ¡Kawsachun Juan Velasco Alvarado! ¡Kawsachun qhichwa siminchik!